Gjatë viteve të fundit, me rritjen e intensitetit të përdorimit të internetit, kërcënimet dhe llojet e tyre janë në rritje, ku sulme dhe incidente të ndryshme identifikohen çdo ditë dhe një pjesë e tyre kanë sjellë humbje dhe pasoja në jetën dhe ekonominë e njerëzve dhe organizatave publike dhe private. Kërcënimet në vetvete janë të brendshme dhe të jashtme dhe secili prej tyre ka efektet e tij tek mbarëvajtja e organizatës. Por, sipas studimeve të fundit, aktualisht kompanitë ndihen të kërcënuara më tepër nga sulmet e brendshme se sa nga sulmet e jashtme. Kjo për vetë faktin se këto kërcënime nuk mund të eleminohen asnjëherë plotësisht për sa kohë njeriu është faktori kryesor si kërcënim i brendshëm ndaj sigurisë së një organizate. Ky artikull ka në fokus punonjësin e privilegjuar si kërcënim të brendshëm në një organizatë. Qëllimi kryesor është të nxjerrë në pah kërcënimet e brendshme të sigurisë si dhe të prezantojë disa mënyra se si këto kërcënime mund të minimizohen. Ky qëllim është arritur nëpërmjet politikave dhe implementimit të një zgjidhjeje praktike për monitorimin e sesionit të privilegjuar, të cilat janë reflektuar në fund të artikullit.